سعوديات لكنا نعيش بقلب يونــانـــي

أدور للمدينه في خيال حطه أفلاطون
سعوديه ولكني بعيش بحلم يوناني

بعيش بـحـلم يرفعني على روس البشروآمون
أصير أكبر من إحساس السنين الميت الفاني

ابتفرعـن واصير اكبر من إني انحسب فرعون
بصير اكبر من آثار القتيل وحجة الجاني

أبيك تكون يالقاضي مع (الونه) عضيد وعون
على اللي حيل حطمني وزاد سنين حرماني

أحط أحلامي بكفه ويحلف للغرام يصون
وأنه مهما يحصل له أبد ماراح ينساني

حكا للناس علقني وهو زادالـجنون جنون
وأنا لجله أبتفاخر أمام الناس بـجناني

بنى لي وسط أضلاعه خنادق غايره وحصون
دخلت فوسط خفّـاقه ولا أدري وين وداني

هربت من الوريد اللي يقيد قامة المسجون
عشان ألقى مفاتيح الخلاص بوسط شرياني

أدور أسأل صديقاتي وأردد يابشر تكفون
أنا ويني ماعاد أدري ولا أدري وين بلقاني

أدورني مابين آخر مدارات امتزاج اللون
ولكن للأسف إني ماعاد أشوف الواني

سواد انصب في عين(ن)حوت قبل الفراق الكون
تسربل في الحشا لين السواد بصمت أعماني

بغيت أعيش لكنه قتلني وابتسم بالهون
ذبح نصفه قبل لاكمل بقلبه نصفي الثاني

ذبحني وارتفع رأسه على بيد(ن)تسمى متون
دخيل الموت غني لي بودي اسمع أغاني

تراي أسمع تراتيل العروق بداخلي يبكون
وأحس إني عشان أحيا لزوم أقيد لساني